මගෙ හීනය මට විඳින්න....

හැඟුම් නොමැති නිද්‍රාවක

නෙතු පියාන නිදා උන්න

මේ නුපුරුදු කළු හීනෙන්

සෙමින් ඇවිත් මා මුදන්න

නුඹෙ දෙතොලග පුරා ගැයෙන 

ඒ සොඳුරුම හැඟුම් ගොන්න

ඔය පපුවට තුරුලු කරන් 

මගෙ නෙතුපිය මත ඉහින්න

රතු පාටට විල් දිය මත

හිරු දියවෙන හැන්දෑවට

ගී මුමුණන මදනලකින්

මගෙ හීනෙට නුඹ එබෙන්න

අතැඟිළි තුඩු මිරිකාගෙන

ඉඳහිට ඔය හද අවුලන

ගිනි සිළුවක දවටාගෙන

නුඹෙ ගීතය මට ගයන්න

නිල දිලිහෙන පිණිබිඳු මත

මගෙ මෘදු හදවත තියන්න

රන් පාටට ඉගිලෙන මුදු

සමනළ තටුවක් වියන්න

නුඹෙ ගැඹුරුම හදගැස්මට

වැතිරීගෙන නිදි වදින්න

පොඩියක් මට ඉඩ දෙනවද

මගෙ හීනය මට විඳින්න

෴මංචි෴