සුදු පාට ලෝකයක....නවතිමුද මොහොතකට.....

     මේ දවස් වල වසීලිස්සගෙ රටට ශීත සෘතුව හෙවත් සාමාන්‍ය භාවිත භාශාවෙන් කිව්වොත් වින්ටර් එක ලබලනෙ..සාමාන්‍යයෙන් වින්ටර් එක මැදක් වෙද්දි නම්  උශ්ණත්වය - 30ක් -35ක් හෝට ඊට වඩා වුණත් අඩු වෙනව වුණත් තවම පටන් ගත්ත කාලෙ නිසා වැඩියම සීතල නෑ.. පොඩි කාලෙ ඉඳලම හුරු වෙලා නිසා මේ රටවල් වල මිනිස්සුන්ට නම් ඒක ඒ තරම් ලොකු වෙනසක් නොවුණත් උපන් දා ඉඳලම හිරු එළියට උණුසුම් වෙවී...සදාහරිත පොලවක සැහැල්ලු ඇඳුම් පැළදුම් එක්ක ජීවත් වුණු මංචිලාට නම් ඒක ලොකු වෙනසක් බව අමුතුවෙන් කියන්න ඕනෙත් නෑනෙ නේද.. 


     අවංකවම මේ දවස් වල ඇඳෙන් නැගිටගන්නෙ බොහොම අමාරුවෙන්..   සීතල නිසා විතරක්ම නෙවෙයි..සාමාන්‍යයෙන් ශීත සෘතුව ලබද්දි දවල් කාලය කෙටි වෙන්නත් ගන්නවනෙ..ඒ කියන්නෙ හිරු එළිය තියෙන පැය ගනන අඩු වෙනවා..ඉක්මනට රෑ වෙලා ආපහු ඉර පායන්නත් පරක්කු වෙනවා..


     ඉතින් පන්ති යන්න ඇඳෙන් නැගිටින වෙලාව වෙද්දිත් යාන්තම් වත් ඉර එළියක් ගෑවිලාවත් නෑ අහසෙ.. වෙනදටනම් වින්ටර් එක ලබද්දි day light saving කියන ක්‍රමයට අනුව වෙලාව පැයකින් පස්සට දානවා.. එතකොට ටිකක් විතර වැඩ කිරිල්ල ශේප් වෙනවා..ඒත් කොරේ පිටට මරේ කිව්වත් වගේ.. මේ වින්ටර් එකේ ඉඳන් ක්‍රියාත්මක වෙන පරිදි වසීලීස්සගෙ රටේ මහරජතුමා ඒ පුරුද්ද අහෝසි කරලලු...   ඉතින් බැරි මරගාතෙ හරි පාන්දරම නැගිටගෙන පන්ති යන එකයි තියෙන්නෙ...  


     හැබැයි ඉතින් අමාරුවෙන් හරි නැගිටගෙන වොශ් එකක් දාගත්තට පස්සෙ සේප්..  


     මංචි මෙහෙම අඬ අඬ කංකෙඳිරිගෑවට අවුරුද්දෙ සෘතු අතරින් දෙවෙනියට ලස්සනම සෘතුව විදිහට මංචි පිලිගන්නෙ ශීත සෘතුව..(පළවෙනියට ලස්සන Autumn එක හොඳේ...)..අනික් අතට මංචිගෙ ජීවිතේට ගොඩාක් ලස්සනම,වටිනම දේවල් එකතු වුණෙත් සීතලම සීතල සිසිරයක් අතර මැදදි බවත් කොහොම අමතක කරන්නද.. 


     හරි හරි ඒ වැල්වටාරම් ඕන නෑ.. 

     ඉතින් එළියට යන්න කලින් බරට බරේ හිම කබා..මෆ්ලර්..මේස් ..බූට්ස් එහෙම තොගයක් ඇඳගෙන තමා එළියට බහින්න වෙන්නෙ..අදත් ඉතින් ඔහොම එළියට බහිද්දි මෙන්න බොලේ හිම වැටෙනවා....!!!!


     හිකිස්..දැන් කට්ටියම මට හිනා වෙනව ඇති නේද...  අවුරුදු තුනක් වසීලීස්සගෙ රටේ ඉඳලත් හිම වැටෙනව දැක්කම ගොඩයට මැජික් වගේද කියල... ආහ්හ්හ්...මට විතරක් නෙවෙයි..ඔයාලට වුණත් එහෙම හිතේවී..ඔයාලත් වින්ටර් එකට මම වගේම ආසනම්..  


     අනික තවම වින්ටර් එක පටන් ගත්ත ගමන් නිසා හරි හමන් විදිහකට හිම වැටෙන්නෙ කලාතුරකිනුයි..ගොඩක් වෙලාවට රෑ පුරාම හිම වැටිලා උදේට දිය වෙලා ගිහින්.එක්කො මිනිස්සු ඒව උඩ ඇවිදලා මඩ පාට වෙලා..ඉතින් අලුතින්ම හිම වැටෙද්දි හරිම ආස හිතෙනවා..මංචි මුලින්ම හිම දැක්ක දවසෙ දැනුනු හැඟීම නම් වචන වලින් විස්තර කරන්න බෑ යාලුවනේ..   හරියට හයිකු කවියක් වගේ... අපි අපිම තේරුම් ගන්නව මිසක නියම අරුතක් දෙන්න අමාරුයි..එදා ඇති වෙනකල් හිමේ නට නට ඉඳලා...අන්තිමට හිම පොඩ්ඩක් දිව ගාලා බලන්නත් මංචි අමතක කලේ නෑ.. හදිසියෙ හරි හිම සීනී වගේ පැණි රස වුණොත් එහෙමෙ නේද..???...හිකිස්....  


     මංචිටනම් හිම වැටෙද්දි දැනෙන්නෙ අමුතුම හැඟීමක්..හරියට මුලු ලෝකෙම සාමකාමී වෙලා වගේ..හිම පියලි ඇවිත් මූනෙ වදිද්දි ඇස් දෙක පියාගෙන ඉන්න මංචි හරිම ආසයි.....වෙලාවකට කාමරේ ජනෙල් පඩිය උඩට වෙලා හිම වැටෙන දිහා බලාගෙන ඉන්න මංචි හරි කැමතියි..  


     ඉස්සරනම් හිත එක එක පාරවල් දිගේ ඇදිලා ගියත්..දැන්නම් හිම කියන වචනෙ ඇහුවත් මතක් වෙන්නෙ එකම එක මතක ගොන්නක් විතරයි...ඒ ගැන හිතනකොටත් මංචිට බයක් දැනෙනෙනවා...දවසක ඒ මතකයන් මතකයන් විතරක්ම වුනොත් මංචිට සීතල හිම දිහා බලද්දිත් හදවතින් පිච්චෙන්න සිද්ධ වේවිද කියලත්...හ්ම්ම්ම්  


     අයියෝ...ආයෙත් ට්‍රැක් පැන්නනෙ ඉතින්...හිකිස්...


     දකින දකින හැම පැත්තකම සුදුම සුදු පාටට වැහිල තියෙනව දකින්න කොච්චර ආස වුණත්....ඒව උඩ ඇවිදිද්දි..බූට් සපත්තුවලට හිම කැටිති පෑගෙද්දි ඇහෙන කිරි කිරි සද්දෙට නං මම පොඩ්ඩක්වත් ආස නෑ...   හරියට ''අනේ අපිව පාගන්න එපා...''කියල එයාල අඬනව වගෙයි ඒ සද්දෙ..පව් නේද......


     අද උදේ එළියට බැස්සමත් මංචිට හරිම සතුටු හිතුනා..ඒ ඉතින් හිම වැටෙන්න පටන් අරං තිබුණු නිසාය කියල දන්නවනෙ.....මුලු ලෝකෙම අලුත් වෙලා වගේ දැනුනා..   ඒත් ඉතින් දුක තමා..පංති යන ගමන් හිමේ සෙල්ලම් කර කර ඉන්න බෑ නේ...ඒ වුණත් පුලුවන් තරම් වෙලා අරගෙන අලුත් හිමේ ඇඳුණු අලුත් අලුත් රටා එහෙමත් බල බල යන්න අමතක කළේ නෑ.. එතකොට තමා මංචි මේ අවුරුදු 3ටම නොදැකපු විදිහට තුනී හිම තලාව උඩ පරවියන්ගෙ අඩි සටහන් තියෙනව දැක්කෙ...ඔය පින්තූරෙ තියෙන්නෙ...දැක්ක නේද...?? බලන්න ලස්සනයි නේද කියල..... 


     ආහ්හ් කියන්න අමතක වුණානෙ..සාමාන්‍යයෙන් කොච්චර හිම වැටුනත් වින්ටර් එකේ මුල් කාලෙදි ගස් වල අතු රිකිළි වල රැඳෙන්න තරම් සියුම් විදිහට හිම පතනයක් වෙන්නෙ කලාතුරකින්..අද අන්න ඒ විදිහට හිම වැටිල තිබුණු එකත් විශේෂත්වයක්...කොළ හැලිල නිරුවත් වෙලා හිටපු අතු රිකිළි වට කරගෙන..හරිම තුනීයට සියුම් සේද රෙදි එළල වගේ තමයි...එහෙම යාන්තම් වැටුනු හිම පටලය මංචිටනම් පෙනුනෙ...


     හිකිස්..ඉතින් ඔහොම උඩ බිම බල බල හීන දැක දැක ගිහින් පංතියට යාගන්න පරක්කුත් වුණා ඕං...   ඒත් ඉතින් හිතට හරිම සැහැල්ලුවක් දැනුනා ඇත්තටම...


     වින්ටර් එකේ මැදක් වෙද්දි එක දිගට හිම වැටිලා මුලු ලෝකෙම හිමෙන් වැහිලා යනවා වගේ වුණාම නම් හරිම ලස්සනයි..මංචිගෙ කාමරේ තියෙන්නෙ හොස්ටල් එකේ 7 වෙනි තට්ටුවෙ නිසා...කාමරේ ජනේලෙන් එබුනහම පේන්නෙ හරිම ලස්සන හිම යායක්..ඔය පහල තියෙන්නෙ පහුගිය වින්ටර් එකේ කාමරේ ජනෙල් පඩිය උඩ ඉඳගෙන ඉද්දි ගත්ත පින්තූර.....

හොස්ටල් එක ඉස්සරහ තියෙන ඇපල් ගහ

ගස් උඩ වැටුණු හිම සේලය... :)

ඈතින් පේන හිම යාය

     ආහ්හ්... ඒ වගේම නියම ෆන් වැඩේ තමා හිම බෝල වලින් ගහගන්න එක..මංචියි එයාගෙ පිස්සු යාලුවොඉ නම්...හුස්ම හිර වෙන තරම් සීතල අල්ලනකල්ම හිම වලින් ගහගෙන තියෙනවා...හෙහ් හෙහ්...මතක් වෙද්දිත් හිනා වෙලා මැරෙනවා...   ඒ වගේම හිම මිනිහෙක් හදන එකත් නියම වැඩක්...හරිම ලේසියි වගේ පෙනුනට අලිම අලි හිම ගොඩක් බෝලයක් කරන්න ගියාම හොඳ පන යන බව දන්නෙ හදපු එකාම තමා...

     අවාසනාවට වගේ මංචිලා හදපු හිම මිනිහගෙ පින්තූරයක් නම් නෑ...වෙන කවුදෝ කට්ටියක් හොස්ටල් එක ගාව හදල තිබ්බ හිම මිනිහෙක්ගෙ පින්තූරයක් තමා ඔය තියෙන්නෙ හොදේ...

     එහෙමනම් ඔන්න ඕව තමා මංචිට හිමත් එක්ක තියෙන අත්දැකීම් වලින් කොටසක්...තව හිම ගොඩාරියක් වැටුනහම තව හිම පෝස්ට් එකක් දාන්නම්කෝ......හරි එහෙනම් මංචි උණුම උණු නෙස්කැෆේ එකක් හදාගෙන එනකල්   ඔයාල වෙවුල වෙවුල වසීලීස්සගෙ රටේ සීත සෘතුව සීතමම සීතල ගැන හීනයක් බලන්න හොඳේ........